اسئلة تشغل عقل كل يمني: من هم الدولة؟ ومن هم المليشيات؟

مجلي القبيسي – وما يسطرون – المساء برس|

من هم الدولة ..؟
ومن هم المليشيات .. ؟

الحوثي معه صواريخ بالستية وطايرات مسيرة
وصواريخ موجهة وحرارية .. وقناصات ليلية ووووووالخ

وهادي والجيش الوطني مابش معاهم من هولا ولا واحدة

الحوثي الان متحكم في العملة كلها وقد جعل العملة القديمة
اغلا من الجديدة ..
إذا ارسلت مية الف بالعملة القديمة تدفع ألفين قرش للصرافة
فقط واذا ارسلت مائة الف جديدة تدفع عشرة الف ريال

الدولار الان عند الحوثي ب 590 ريال
وعند الشرعية ب 650 ريال
ونفس الخبر في الريال السعودي

اذا ودك تصرف ألف سعودي عند الصرافين في مناطق الشرعية
يقل لك الصراف ب 150 الف سعر صنعاء
واذا ودك تشتري منه الف سعودي يقل لك ب 170 الف بسعر مناطق الشرعية

الحوثي يزوره المبعوث الأممي لا صنعاء كل مرة
وهادي ولا قد لقيه ولا يعرفه .

الحوثي والمشاط .. وحبتور .. وكل قياداتهم المليشاوية موجودين في صنعاء .. رغم قصف طيران التحالف لهم .
وهادي والحكومة حقنا غايبين باستثناء اثنين او ثلاثة وزراء
والباقي بيديروا الدولة بالوتس وتويتر من داخل الفنادق

الحوثي الانقلابي ومليشياته متحكمين في الاتصالات وشبكات التواصل الاجتماعي . وبيراقبوا كل شي .. ومن امتلك المعلومة كانت له الغلبة في الميدان . وهذا شي بديهي
واحنا ولا استطاعت الدولة الشرعية توفير شركة اتصالات خاصة بها . ولا سحبت البساط على الحوثي رغم قدرتها .

الحوثي معه ميناء الحديدة البحري فقط ..
وبيوصله كل شي السلاح النوعي والغذاء .. والدواء وووووالخ
وبيتحكم في كل شي .

واحنا البنك عندنا والنفط عندنا والغاز عندنا
واهم المنافذ البرية والبحرية عندنا .
وممنوع نشتري سلاح ..
وممنوع نصدر نفط
ممنوع نشغل المواني

الحوثي انقلابي مليشاوي معتدي قاتل سفاح سارق باجماع العالم كله عدا ايران
واحنا دولة شرعية ورئيسها شرعي با اعتراف العالم كله
وتحالف عشر دول عربية معانا .. ومع ذلك لم نستطع ان نتحكم في شي ولانضغط عليه بشي .

هل رئيسنا خائن .؟ أم قادة الشرعية الاخرين ؟
أم التحالف ؟
وهل صارت الدولة الشرعية مليشيات ؟
أم ان المليشيات الانقلابية صاروا دولة ؟

المصدر: من حائط الكاتب على صفحته بالفيس بوك