طلعت الشرجبي يكتب بسخرية وكوميديا عن الشرعية وأنصار الله خلال 5 سنوات مضت

طلعت الشرجبي – وما يسطرون – المساء برس| الصدق الواحد بعد هذه السنوات العجاف يرجع يسلم خوره.
يعني تكون جالس مع خبرتك بأمان الله وقدكم مطننين وانت تقلب الموضوع براسك مجرد تفكير بس.
وتحسب اللي يحصل بالبلاد من 5 سنوات بينك وبين نفسك بدون ما اللي جنبك حتى يحس بك.
فجأة ولا تدري بنفسك الا وقد صوتك ارتفع سع مجاذيب ابن علوان وانت تقول (هو الله).
واللي جنبك يفزعوا وبصوت واحد يردوا عليك اسلمت ياعدو الله. هههههههههه
ترجع تقلب الموضوع معاهم زبجه.
لكن واحد منهم قريب منك وفاهمك صح. وطبعه فحاس
يصر الا تحكيلهم مال عارك ايش في. امانه تقول.
ترجع تقول: والله مافي الا جالس مطنن على اللي حاصل من 5 سنين
كانوا يشطحوا وينطحوا فوقنا واللي بيدخل باسبوع واللي بيدخل صنعاء بشهر ورجعت سته اشهر وبعدين سنه.
وانت تدخل الفيس سع الاتيم انت وقليلين تكاوشوا العدوان والمرتزقه وتخرج وقدك محمل ايور ولعن وسب بشوالات.
كانت الطائرات فوق راسنا يحلقين سع الموترات رايحات راجعات ولا خلين شيء الا وقصفوه.
ونحن جالسين نحسبن (حسبنا الله ونعم الوكيل) مانت داري متى اشتقوم من تحت الانقاض.
واشعلوا 18 جبهه على البر وجندوا مرتزقة العالم ومن كل الجنسيات وحشدوا احدث الاليات والمدرعات.
وصار القصف من الجو والبر والبحر. غير الحصار والتجويع
واحنا نرجم الله خبرتنا معاهم كم الي وكم صاروخ لو وحراري وشاصات والله ماغير .
وكاوشوا ابتهم قدر المستطاع صمدوا هنا وانكسروا هناك لكن بالمجمل لا يعتبر التحالف والمرتزقه حققوا شيء بحجم التجهيزات والعتاد والاسلحه والامكانات والتغطية الدولية والمشاركة لدول عظمى.
والتحليلات اللي كنا نسمعها انه مهزومين لا يمكن يصمدوا لن يتمكنوا من الصمود امام هذه الترسانه العسكريه هكذا هي المعادله في الحروب.
المهم شوية شوية وقد خبرتنا بجيزان شويه وهم بنجران وقليل وهم يكاوشوا بعسير.
وعاده يرجعوا ومعاهم كم اسير سعودي. ههههههه
قليل قليل الا وقد معانا صواريخ وتوصل لهنا شويه وطولت ورجعت امتدت والمرتزقه قلبوها تنكيت والسعوديين مكنونا مقذوف حوثي . ماعاد درينا الا وقد السعودية تعمل لنا معرض بالمطار وتجيب ثلاث قمم رؤساء وزعماء ملوك يزوروا معرض المقذوفات الحوثيه هههههههه
قليل قليل الا وقد معانا طيران مسير اللي تصور تصور واللي تقصف وتفجر. تفجر.
قالوا ماشي هيا بلا هباله قلك طيران مسير هذه لعبه هذه كرتون هذه ورق المهم وحده ورا وحده الا قدهم يزعقوا منهن ورجعوا هم يغطوا لنا اخبارهن واخبار الهجوم الارهابي اللي تقوم به هذه الطائرات الورقيه.ههههههه
يوم بعد يوم وقد معانا صواريخ بالستي ومجنح كروز وقده مش بس لخميس مشيط والا زي ما كان يردد المرتزقه هو الا لبني الحارث وقرح ماعاد درينا الا وقد الزعيق من الدمام والاخير من حقل الشيبة يعلم الله اينه لس قالوا بحدود الامارات. طبعا درينا منهم لما وصفوا الهجوم الارهابي على الحقل النفطي الذي نفذه الحوثيين.
والايام قد معانا دفاعات جوية وقد نحن نسقط طائرات أمريكية تطير سعما قالوا بارتفاع عالي ومع ذلك زقرناها.
تجي لك للتحالف بعد 5 سنوات من العدوان جالس يتفحتت يتفحتت بعد ماكان 11 دوله ماعاد باقي به الا السعودية وشغمة من مرتزقة البشير.
ورجع يتقاتلوا بينهم بين. وكل واحد يلعن ويخون الثاني.
وشرعية الدنبوع اللي كانت تشتكي بنا لمجلس الامن قدهي تشتي بالإمارات .ههههههههههن
وبدل ماكانوا رافعين شعار قادمون ياصنعاء اليوم قدهو قادمون يا شبوه.
والدنبوع اللي كان شرفع علم الجمهوريه على جبال مران ذلحين حانب كيف شرفع العلم بسقف بيتهم. هههههههه
ونحن مكاننا على مانحن غير ان اللي ضد العدوان زادوا واللي معه طفييوا طفية سراج. باقي كم مزعبق ومزعبقه داخلهم مهزومين لكن عايشين عناد. هههههههههن
المهم عادنا ماكملت احكي لهم الا واسمعهم لصوت واحد
صاحوا (هو الله).
وانا رجعت اسقضي واندع ضحك ة وانا ارد عليهم ها امنتم يا اعداء الله.
هيا شفتتم ان اللي حاصل مالناش به علاقة.
وان الواحد يسلم ويؤمن خوره.

المصدر: من حائط الكاتب على صفحته الشخصية بـ”الفيس بوك”